Landssamband ungmennafélaga (LUF) í samstarfi við Félag Sameinuðu þjóðanna á Íslandi auglýsir eftir framboðum ungs fólks á aldrinum 18-25 ára til að gegna stöðu ungmennafulltrúa Íslands gagnvart Sameinuðu þjóðunum á sviði Mannréttinda. Kjörið fer fram á Sambandsþingi LUF 2024 í Hörpu þann 24. febrúar.

Ungmennafulltrúi Íslands á sviði mannréttinda er skipaður til eins árs og mun þurfa sækja allsherjarþing Sameinuðu þjóðanna í New York. Sömuleiðis situr ungmennafulltrúinn í sendinefnd LUF hjá SÞ auk þess að eiga sæti í alþjóðaráði LUF. Umsækjendur verða að geta skuldbundið sig stöðunni í tvö ár auk þess að sækja alla viðburði sem af þeim er krafist. Þá er búist við að ungmennafulltrúar á vegum LUF sæki Leiðtogaskóla Íslands og taki virkan þátt í starfi LUF auk Félags Sameinuðu þjóðanna

Frestur til tilnefningar rennur út á miðnætti 17. febrúar 2024 en kjör fulltrúans fer fram á sambandsþingi LUF 24. febrúar 2024.

Ungmennafulltrúar Sameinuðu þjóðanna
Ungmennafulltrúar Íslands hjá Sameinuðu þjóðunum eru lýðræðislega kjörnir af aðildarfélögum LUF, starfa í umboði þeirra og allra þeirra meðlima og vinna út frá þeirri stefnu sem mótuð er á vettvangi LUF. Fulltrúar gegna embættinu í tvö ár, fyrra árið sem “junior” fulltrúi og seinna árið sem “senior” fulltrúi. Allir ungmennafulltrúar sitja í Sendinefnd LUF til Sameinuðu þjóðanna. Sendinefndin er samstarfsverkefni LUF og Félags Sameinuðu þjóðanna á Íslandi sem vinna að aukinni þátttöku Ungmennafulltrúa Íslands á viðburðum Sameinuðu þjóðanna (e. UN Youth Delegation Programme). Verkefnið er unnið í samstarfi við Félags- og vinnumálaráðuneytið, forsætisráðuneytið, umhverfis-, orku- og loftslagsráðuneytið, utanríkisráðuneytið, mennta- og barnamálaráðuneytið og menningar- og viðskiptaráðuneytið.

Hæfniskröfur:

  1. Umboð frá aðildarfélagi LUF.
  2. Vera á aldrinum 18 – 25 ára.
  3. Hafa þekkingu á Heimsmarkmiðum Sameinuðu þjóðanna.
  4. Hafa reynslu af hagsmunastarfi ungmennafélaga.
  5. Búa yfir leiðtogahæfni og frumkvæði.
  6. Hafa vald á íslensku og ensku í ræðu og riti.
  7. Viðeigandi menntun sem nýtist í embætti og/eða þekking á Sameinuðu þjóðunum er kostur.
  8. Hafa tök á að skuldbinda sig hlutverkinu til tveggja ára með virkri þátttöku í starfi LUF.
  9. Hafa íslenskt ríkisfang auk fastrar búsetu á Íslandi að jafnaði.

Hvernig býð ég mig fram?
Öll aðildarfélög LUF (með fulla aðild og áheyrnaraðild) geta boðið fram einn fulltrúa. Áhugasamir félagsmenn aðildarfélaga LUF þurfa því að óska eftir umboði frá stjórn viðkomandi félags. Stjórnin tilkynnir framboð með því að fylla út skráningarform, sem öll aðildarfélög koma til með að fá sent í fundarboði. Með umboði staðfestir stjórn að frambjóðandinn uppfylli ofantaldar hæfniskröfur.

Embættið er sjálfboðastarf, að dagpeningum erlendis undanskildum.