Sendinefnd LUF hjá Sameinuðu þjóðunum - Landssamband ungmennafélaga

Ungmennafulltrúar Íslands skipa sendinefnd Landssambands ungmennafélaga (LUF) hjá Sameinuðu þjóðunum. Ungmennafulltrúar eru lýðræðislega kjörnir af aðildarfélögum LUF og sækja viðburði Sameinuðu þjóðanna í umboði íslenskra ungmenna.

Sendinefnin er samstarfsverkefni LUF og Félags Sameinuðu þjóðanna á Íslandi sem vinna að aukinni þátttöku Ungmennafulltrúa Íslands á viðburðum Sameinuðu þjóðanna (e. UN Youth Delegation Programme.) Ungmennafulltrúarnir sækja viðburði í samstarfi eftirfarandi ráðuneyti: Umhverfis- og auðlindaráðuneytið, forsætisráðuneytið og utanríkisráðuneytið.

Sendinefndin skipar nú þrjá fulltrúa, en á næstu misserum verða skipaðir fulltrúar á fleiri sviðum sem falla undir Heimsmarkmið Sameinuðu þjóðanna.

Sendinefndin

Esther HallsdóttirSvið mannréttinda

Aðalbjörg EgilsdóttirSvið loftslagsmála

Tinna HallgrímsdóttirSvið sjálfbærar þróunar

Jökull Ingi ÞorvaldssonSvið barna og ungmenna

Eva Dröfn Hassell GuðmundsdóttirSvið kynjajafnréttis

Hlutverk

Nefndin er enn í mótun en markmið hennar er að vinna sem starfshópur LUF um málefni ungs fólks hjá SÞ. Nefndin virkar sem vinnuhópur, ráðgjafaráð, upplýsingaveita og brú á milli LUF, Félags SÞ á Íslandi og sendandi ráðuneyta. Fulltrúarnir munu gegna embættinu í tvö ár, þar til nýr tekur við.

Saga

Þátttaka ungs fólks í ákvarðanatöku og stefnumótun er ein af megináherslum Sameinuðu þjóðanna og þess vegna hafa aðildarríki um árabil verið hvött til að skipa ungmennafulltrúa sem veita sérfræðiþekkingu, innsýn og nauðsynlega ráðgjöf þegar kemur að sjálfbærri þróun.

Flest ríki Evrópu hafa lengi skipað ungmennafulltrúa, sum frá árinu 1970 og önnur skipa yfir 20 fulltrúa sem sækja flesta viðburði Sameinuðu þjóðanna. LUF hefur lengi barist fyrir slíku fyrirkomulagi hérlendis og skipaði loks sinn fyrsta fulltrúa í ágúst árið 2019. Sendinefndin er á góðri leið með að mótast með nánu samstarfi við Félag Sameinuðu þjóðanna á Íslandi og með stuðningi umhverfis- og auðlindaráðuneytisins, utanríkisráðuneytisins, forsætisráðuneytisins og mennta- og menningarmálaráðuneytisins.

Mannréttindi

Mynd: Utanríkisráðuneytið

Esther Hallsdóttir var fyrsti kjörni ungmennafulltrúi Íslands hjá Sameinuðu þjóðunum. Hún bauð sig fram fyrir hönd Ungra Evrópusinna og var kjörin fulltrúi á sviði mannréttinda. Í kjölfarið sótti Esther allsherjaþing Sameinuðu þjóðanna í New York í september, árið 2019, í samstarfi við utanríkisráðuneytið.

Á allsherjaþinginu tók Esther þátt í nefndarstörfum þingsins og flutti ræðu á fundi félags-, mannúðar- og menningarnefndar. Á fundinum var rætt um félagslega þróun, þar með talin réttindi ungmenna. Í ræðu sinni varpaði Esther ljósi á mikilvægi aðkomu ungs fólks að ákvörðunartöku, jafnréttismál og hvatti þjóðarleiðtoga til að sýna frekari samstöðu í aðgerðum gegn loftslagsbreytingum.

„Ungt fólk skorar á þjóðarleiðtoga til að skuldbinda sig til alþjóðlegrar samvinnu, velja víðsýni umfram einangrun, sýna samstöðu og gleyma ekki mikilvægi þess að gefa ungmennum kost á þátttöku,“ sagði Esther meðal annars í ræðu sinni.

Sjá ræðu í heild.

Loftslagsmál

Aðalbjörg Egilsdóttir, fulltrúi Stúdentaráðs HÍ, var kjörin ungmennafulltrúi Íslands hjá Sameinuðu þjóðunum á sviði Loftslagsmála í nóvember, árið 2019. Í kjölfarið sótti hún Loftslagsráðstefnu Sameinuðu þjóðanna (e. Conference of the Parties to the United Nations Framework Convention on Climate Change (COP25)) sem haldin var í Madríd í desember sama ár í samstarfi við umhverfis- og auðlindaráðuneytið.

Á ráðstefnunni talaði hún um mikilvægi þess að hlusta á alla í samningaferlinu. „Skilaboð mín frá COP25 til stjórnmálamanna á Norðurlöndum annarra samningsaðila er að muna eftir öllum,” sagði hún meðal annars og ítrekaði mikilvægi þess að ólík sjónarmið kæmust að í samningaferlinu. „Til þess að verða sjálfbærasta svæði í heiminum er nauðsynlegt að styðja við sjálfbærni á öðrum svæðum. Við verðum að muna eftir þeim sem glíma við meiri fátækt, muna að þau hafa rödd og þurfa sæti við sama borð. Auk þess verðum við að muna eftir unga fólkinu.”

Sjálfbær þróun

Tinna Hallgrímsdóttir var kjörin ungmennafulltrúi Íslands hjá Sameinuðu þjóðunum á sviði sjálfbærrar þróunar á sambandsþingi LUF í febrúar sl. Tinna er fulltrúi Ungra umhverfissinna og undir eðlilegum kringumstæðum hefði hún sótt ráðherrafund Sameinuðu þjóðanna (e. United Nations High-Level Political Forum (HLPF 2020,) í samstarfi við forsætisráðuneytið. Vegna útbreiðslu COVID-19 hefur fundunum verið frestað um óákveðinn tíma.

Í framboðsræðu sinni varpaði Tinna ljósi mikilvægi þess að fræða ungt fólk um sjálfbæra þróun. „Ég tel að besti leiðtoginn sé sá sem valdeflir aðra og hef ég haft það að leiðarljósi í mínu starfi og lagt mikla áherslu á að virkja og fræða ungt fólk. Ég yrði afar þakklát ef ég yrði fyrir valinu í þessa stöðu og get lofað því að nýta tækifærið sem allra best til koma á framfæri sjónarmiðum ungs fólks á Íslandi um sjálfbæra þróun”

Samstarfsaðilar

Sendinefnd LUF hjá Sameinuðu þjóðunum er samstarfsverkefni Félags sameinuðu þjóðanna, utanríkisráðuneytisins og annara ráðuneyta sem eiga aðild að viðburðum SÞ, forsætisráðuneytið og umhverfis- og auðlindaráðuneytið.

Í febrúar, árið 2020, hófst formlegt samstarf milli LUF og utanríkisráðuneytisins með samstarfssamning til næstu þriggja ára, 2020-2022. Markmið samningsins er að m.a. að auka þátttöku íslenskra ungmenna á vettvangi Sameinuðu þjóðanna og efla kynningu og fræðslu á heimsmarkmiðunum og málefnum SÞ.

Guðlaugur Þór Þórðarson, utanríkis – og þróunarsamvinnuráðherra, og Una Hildardóttir, forseti Landssambands Ungmennafélaga (LUF), undirrituðu samstarfssamning ráðuneytisins og LUF fyrir árin 2020 – 2022.

Skipun fulltrúa

Öll aðildarfélög LUF (með fulla aðild og áheyrnaraðild) geta boðið fram einn fulltrúa í hvert embætti. Áhugasamir félagsmenn aðildarfélaga LUF þurfa því að óska eftir umboði frá stjórn viðkomandi félags fyrir settan framboðsfrest. Stjórnin tilkynnir framboð með því að fylla út skráningarform sem öll aðildarfélög fá í fundarboði. Skipun nýrra fulltrúa er iðulega auglýst á vefsíðu og Facebook-síðu LUF og kosningar fara fam ýmist á leiðtogaráðsfundum eða sambandsþingi LUF.

Með umboði staðfestir stjórn að frambjóðandinn uppfylli eftirfarandi hæfnikröfur.

Hæfnikröfur:

Umboð frá aðildarfélagi LUF.
Vera á aldrinum 18 (þegar viðburður hefst) – 25 ára.
Hafa þekkingu á málefnasviðinu.
Hafa reynslu af hagsmunastarfi ungmennafélaga.
Búa yfir leiðtogahæfni og frumkvæði.
Hafa vald á íslensku og ensku í ræðu og riti.
Viðeigandi menntun sem nýtist í embætti / þekking á Sameinuðu þjóðunum er kostur.

Embættið er sjálfboðastarf, að dagpeningum erlendis undanskildum.

Ungmennafélög þurfa að falla undir regnhlíf LUF til að geta tilnefnt fulltrúa. Önnur félög sem falla undir kröfur LUF, eru lýðræðisleg, frjáls félagasamtök stýrð af ungi fólki, geta kynnt sér aðgangskröfur LUF og sótt um aðild hér. Meðferð umsókna fer fram á sambandsþingi LUF í upphafi hvers árs.

Kosningarferli

Frambjóðendur þurfa meirihluta atkvæða til að hljóta kjör. Á kosningafundinum, hvort sem á leiðtogaráðsfundi eða sambandsþingi LUF, fá fulltrúar tækifæri til að kynna stefnumál sín í framboðsræðu. Í kjölfarið er kosið í einni eða tveimur umferðum þar til hreinn meirihluti liggur fyrir. Aðildarfélög skrá þingfulltrúa fyrir fundinn og fá úthlutað atkvæðum í samræmi við fjölda þingfulltrúa.