LUF auglýsir eftir tilnefningum til Skörungsins – íslensku ungmennaverðlaunanna

Skörungur – íslensku ungmennaverðlaunin fer fram á degi sjálfboðaliðans þann 5. desember, kl. 17:15 í Mannréttindahúsinu að Sigtúni 42. Um er að ræða nýjan þakkar- og hvatningarviðburð ungs fólks sem tekur við af „Félaga ársins” sem LUF hefur staðið fyrir síðastliðin 5 ár. Facebook viðburð má finna hér.

LUF auglýsir hér með eftir tilnefningum frá aðildarfélögunum til Skörungsins fyrir sjálfboðaliða ársins (áður „Félagi ársins“). Hvert aðildarfélag getur tilnefnt einn einstakling til verðlaunanna og hvetur LUF öll aðildarfélög sín til þess að senda inn tilnefningu ásamt rökstuðningi hér. Öll sem hljóta tilnefningu til Skörungsins frá aðildarfélagi í flokki sjálfboðaliða ársins verða beiðnir um að veita viðurkenningu þess efnis mótttöku á degi sjálfboðaliðans. Þá er öllum frjálst til að tilnefna í aðra flokka. Frestur til þess að tilnefna sjálfboðaliða ársins er eigi síðar en sunnudaginn 3. desember 2023. 

Skörungur – íslensku ungmennaverðlaunin eru veitt í fjórum flokkum:

1.) Sjálfboðaliðaliði ársins
Verðlaunin Sjálfboðaliði ársins eru veitt meðlimi aðildarfélags LUF fyrir eftirtektaverða framtakssemi og dugnað í sjálfboðaliðavinnu í þágu síns félags. Tilnefna aðildarfélög LUF einn sjálfboðaliða úr sínu félagi til verðlaunanna. Hægt er að tilnefna til verðlaunanna hér.

2.) Verkefni ársins
Verðlaunin eru veitt fyrir verkefni sem skilað hefur árangri eða leitt af sér nýsköpun í hagsmuna- og réttindabaráttu ungs fólks. Öllum er frjálst að tilnefna til verkefnis ársins hér.

3.) Framlag til mannréttinda
Verðlaunin eru veitt einstaklingi fyrir verðugt framlag til mannréttinda og baráttu ungs fólks fyrir réttindum sínum. Öllum er frjálst að tilnefna til verðlaunanna hér.

4.) Framtak í þágu ungs fólks
Verðlaunin eru veitt einstaklingum, hópum, félögum, stofnunum eða fyrirtækjum fyrir eftirtektarvert framtak í þágu hagsmuna og réttinda ungs fólks. Öllum er frjálst að tilnefna til verðlaunanna hér.

Skörungur – íslensku ungmennaverðlaunin er uppskeruhátíð LUF, um er að ræða þakkar- og hvatningarviðburð þar sem aðildarfélög fá tækifæri til þess að velja framúrskarandi meðlimi sem þau vilja umbuna og þakka fyrir dugnað og vel unnin störf.

Tilgangur viðburðarins er að vekja athygli á degi sjálfboðaliðans og fyrir hvað hann stendur, en fyrst og fremst að hvetja ungt fólk í sjálfboðastarfi til dáða sem og varpa ljósi á vel unnin störf innan ungmennafélaga á Íslandi og framlag til réttindabaráttu ungs fólks.

Viðburðurinn er liður í mannréttindavikunni og fer fram í Mannréttindahúsinu að Sigtúni 42.